【明報專訊】《施政報告》剛剛先話要幫青年創業，話咁快就有人願意幫手，透過香港青年協會借出佐敦一間地舖，話畀年輕人創業搞食肆，月租只需要1蚊，就可借用市值5、6萬元租金嘅舖位，最長可以租兩年。 「低調女士」借佐敦舖 市值租5萬 呢間地舖位於佐敦上海街28號恒邦商業中心地下1號舖(圖右)，鄰近廟街，距離佐敦站5分鐘路程，交通方便，實用面積約700呎，但青協指明必須做食肆。有興趣嘅年輕人可以透過青協「香港青年創業計劃」申請，缺乏開業資金而未曾創業嘅申請人，要提交實際創業構思，並且打算喺一年內開業；而已經創業、但開業唔多過3年嘅青年都可以申請，要提交完整商業計劃同營運報告，若有飲食專業技能將獲優先考慮。 青協督導主任鄧良順話，早前有個低調、做製衣公司嘅女士想幫年輕人易啲創業，所以借出呢個自置地舖，成功申請嘅創業者仲可借到最多15萬嘅免息貸款做資金。鄧又解釋，業主認為年輕人吸收兩年經驗就夠出去闖吓，所以地舖最長只借兩年，但如果年輕人做唔住要中途離場，業主都唔介意。 (青協提供)
|
| |
| |
;){kind=small}
;)
