【明報專訊】警務處長曾偉雄(「一哥」)5月就屆57歲退休之齡，佢噚日出席警察隊員佐級協會新春團拜酒會，大家都好關心究竟佢會唔會準時退休？一哥就話要等政府公布，但究竟佢退休之後會做啲乜呢？一哥就話要執屋同執寫字樓，因為唔執會畀人鬧，又自言「幾十年無執吓個樣，要執執」。 做政協否？「唔識做，太深」 咁究竟曾偉雄會唔會好似有「Sorry sir」之稱嘅前處長鄧竟成咁做政協？佢就話「唔識做，太深」，仲笑言「無咁大個頭，唔好戴咁大頂帽」，又話鄧sir高自己幾班。一哥話對做義工有興趣，至於會唔會做私人機構，佢就無正面回答嘞。 一哥好鍾意行山，之前約咗記者退休前行一轉，今次佢就話退咗休之後，記者仲睬佢先算啦。咁佢行山時有無「野生捕獲」過「發哥」周潤發先？專向「五星級」難度山路挑戰嘅一哥就話大家行嘅路線唔同，仲話自己畀市民「捕獲」就有，但佢就唔識用自拍神棍同人selfie嘞。 噚日一哥心情靚靚，留低同好多同事合照；至於「未來一哥」熱門、副警務處長盧偉聰，就有記者搵佢selfie，人氣唔差過財爺曾俊華。 一哥又話，喺佔領79日期間一直有留守警總無走開，佢話唔想發生啲咩事，自己唔喺度會後悔。 盧sir就話佔中時有八成時間都喺office，夜晚就瞓尼龍牀，朝早就同其他留宿警總嘅大sir一齊喺廁所刷牙，笑言好似返咗學堂咁。
|
| |
| |
;){kind=small}
;)
