【明報專訊】猴年將至，小朋友最高興嘅莫過於收利市，如果由政務司長林鄭月娥親手送上，唔知又會否加倍開心？中華總商會噚日舉辦慈善活動，邀請近400個來自社福機構兒童院舍嘅青少年同社工，喺會展享用自助午餐同欣賞魔術、歌唱表演，席間林鄭向小朋友大派利市(圖)，有人笑到見牙唔見眼。有出席小朋友同Emily講，話收到嘅利市有100蚊，而據知利市錢由大會資助。 中總呢個活動係政府「欣賞香港」嘅其中一個項目，啱啱喺前日撩交嗌批評完泛民立法會議員嘅林鄭，噚日致辭時話，社會上有好多爭拗，有時令人感到灰心焦慮，話希望大家識得欣賞香港。財政預算案公布在即，有小朋友就同Emily講，話希望政府增加教育資源，例如提供免費書本同校服，唔知林鄭會唔會同財爺曾俊華反映吓，等香港青少年欣賞埋政府呢？
|
| |
| |
;){kind=small}
;)
