廉署銷毁湯顯明烈酒 「要簡約節儉」
[2017.04.01] 發表
【明報專訊】前廉政專員湯顯明被投訴喺在任期間涉嫌貪污嘅案件，由2013年5月廉署展開刑事調查近3年，律政司舊年決定不起訴。但湯用公費買茅台同紅酒等宴客，「茅台奉客成為常規」令人印象深刻。事隔近4年，廉署話湯顯明在任買嘅剩餘烈酒，已全數銷毁。
廉署曾於2013年6月披露署內存酒量，發現湯顯明上任後起碼買入近千支酒。民主黨立法會議員林卓廷就好關心呢啲酒嘅去向，尋日廉署喺立法會回覆財委會嘅書面提問，話2013年6月開始，廉署已全面禁止喺公務場合飲用烈酒，湯顯明在任買嘅剩餘烈酒，亦已全數銷毁。但其他餐酒就繼續用喺公務宴請，仲有大約40支。
廉署又話，喺籌辦同推行倡廉活動時，可能有需要為參加嘅市民提供飲食，好似戶外活動提供飲品，或見面茶敘提供餅食咁，由於舉辦目的係要社會認識貪污禍害，提供飲食嘅原則係簡約節儉。
更多港聞
相關新聞
