【明報專訊】佔中發起人戴耀廷(Benny)及陳健民等9人早前分別被控串謀作出公眾妨擾等案件，周二開審，雖然好快就要出庭應訊，Benny噚日出席一個喺旺角行人專用區舉辦嘅街頭論壇，心情輕鬆，論壇後被記者問到為案件有咩準備，Benny竟然話準備唔切、減唔切肥，究竟減肥同案件有乜關係？ Benny話案件涉及9個被告，但法庭嘅犯人欄太細，9個人坐唔晒，幾個月前9人一齊上庭時，坐佢隔籬嘅陳健民就投訴，話Benny太肥搞到好迫喎！不過Benny就話自己減肥減唔切喇。 近期Benny不斷被攻擊，好似喺論壇舉行嘅同一時間，對面海嘅添馬公園就有人搞「革走戴耀廷」聚會，大會聲稱有4000人出席，其中專欄作家屈穎妍發言時就以年前鉛水事件比喻，話戴耀廷恍如大學嘅鉛水喉管，將鉛水貫入學生腦內，一定要拆除。不過喺街頭論壇上，就有唔少人支持Benny，有婆婆發言時表明好感謝佢搞佔中，仲呼籲大家聽日一齊去法庭外表達支持。 同喺大學教書嘅陳健民就喺facebook回應屈穎妍嘅言論，話中大社會學系畢業嘅工聯會鄧家彪當年就係跟佢寫畢業論文，「他也算飲過我的『鉛水』，為什麼沒有跑去佔領？」
|
| |
| |
;)
