內會壞燈照開會 議員有情調對談
[2018.05.19] 發表
【明報專訊】平時立法會嘅會議都會燈火通明，不過噚日內會開開下會，會議室內嘅射燈突然熄咗，議員都愕一愕。內會主席李慧琼(Starry)當時好鎮定，即刻叫工作人員睇睇照明系統，之後話「大家都睇到大家」，會議可以繼續。
Starry淡定主持大局
微暗嘅會議室雖然好有情調，但開會就始終唔係咁理想，有議員要開枱頭燈睇文件；有議員啱啱入到會議室見到咁嘅環境，都笑住話係第一次見，擔心有啲議員會瞓?覺！會議室外，一班立法會職員就匆匆忙忙咁搶修燈光系統，但都搵唔出係咩原因。
內會之後緊接有財委會會議，Starry都擔心會影響財會開會，好彩燈光系統喺內會完結之後就整番好，只係短暫失靈咗10分鐘，財會唔使轉房。有立法會職員就話，機電工程署會喺財委會之後詳細檢查發生咩事。
講番會議討論嘅內容，有泛民議員繼續關心政府派「狗仔隊」到立法會監察議員嘅問題，要求Starry同政務司長張建宗會面時表達關注，要求政府交代狗仔隊嘅薪津安排。
更多港聞
相關新聞
