【明報專訊】工聯會立法會議員麥美娟早前開始喺工聯會facebook做直播節目《工聯熱話》，前晚更請咗前特首梁振英一齊開咪，聽市民電話。CY喺一個鐘嘅節目大談時政，話近日無論去街市、花墟，甚至夜晚放狗，都會遇到市民問佢覺得近日亂局點收科，佢認為大家都要多發聲，形容好多青年被誤導，由一般市民發聲係有作用嘅。 擔心被起底？ CY：做乜都有風險 CY話大家唔應該自亂陣腳，形容網上同傳媒都有好多「對方設陷阱打心理戰」嘅信息，但佢認為運動已走下坡，話示威規模、力量下降，但激進行為就有上升。 講到叫大家發聲，麥美娟問，現時唔少人發聲都擔心會被起底，CY就話做任何事都會有風險，舉例話落街都有可能遇到花盆跌落嚟，呼籲大家拎勇氣出嚟，本着愛香港嘅心發聲；強調講道理就唔怕畀人鬧，呼籲大家要打去電台多發聲，亦可以喺社交媒體發表意見。 CY又話現時教育係有「大問題」，佢近日懸紅搵喺學生工作紙度提及「仇警言論」嘅中學老師，佢喺節目話，唔可以失德後道歉就完全唔開名，反問醫生失德係咪可以唔開名，同診所私下解決就算數？
|
| |
| |
;)
