【Emily】戰律師會改選「第12人」 丘律邦官司纏身棄參選
[2021.08.04] 發表
【明報專訊】律師會理事8月24日改選，共11人參選爭5席位，名單包括早前已曝光嘅「專業派」律師黃巧欣等5人、爭連任嘅白樂德同羅彰南、混血女將馬秀雯、外籍律師韋恆理，以及黎蒑同唐瑋綸。Emily近日聽聞原來本身有「第12人」有意披甲，但因為官司關係選擇退出。
消息人士同Emily講，律師丘律邦本身都有意參選，理念較接近「開明派」，不過佢今年3月民主派初選案提堂期間，希望進入法院被拒，警方話佢拒絕出示身分證明文件而拉咗佢，上月仲被落案起訴「故意阻撓警務人員」等3項罪名。消息人士話丘律邦本身都影埋相、做埋參選設計，但一來工作忙，加上有案在身，精神上都攰，唯有放棄。
近期律師會選舉成為法律界話題，民建聯成員、大律師馬恩國任主席嘅香港法學交流基金會發表聲明，話「開明派」陣營已喺理事會佔7席，如再取5席就取得控制權，「律師會恐將陷入政治化的深淵，或被政府收回律師會的自我監管權」，呼籲會員支持「專業派」。
更多港聞
【明報專訊】唔少前區議員、議助辭職變失業，同時職工盟原來請緊人，早前出post分別聘請傳訊主任、工會組織幹事、中心組織幹事。職工盟總幹事蒙兆...
詳情
相關新聞
