【Emily】遠征北區探訪 葉劉嘆劏房戶「悲慘」
[2021.08.05] 發表
【明報專訊】港澳辦主任夏寶龍早前明言，期望2049年香港住屋問題獲極大改善，告別劏房、籠屋。行會成員、新民黨主席葉劉淑儀早前接獲黨友話，有居於上水嘅劏房戶極需協助，所以佢遠征北區探望戶主王女士。葉太形容對方生活非常悲慘，丈夫要留喺深圳照顧母親，自己就患有嚴重腎病未能工作，目前靠每月6000多元綜援生活。
一屋擠8箱洗腎藥水 心願上樓
葉太話，王女士居住嘅大廈全幢都係劏房，其單位就一劏十，80呎租金高達4000幾元，住所仲要放七八箱洗腎用嘅藥水，相當擠迫。雖然藥水由北區醫院免費提供，但運費自付，每月醫療支出高達千幾元。
葉太慨嘆，王女士畀完租金、醫藥費後，每月得番數百元，生活非常拮据，日常生活所需都係靠社區服務接濟。佢話王女士最大心願係盡快上樓，但夫婦2016年申請至今仍未上樓，葉太承諾會向房署同社署跟進。
更多港聞
【明報專訊】疫情衝擊經濟下失業率高企，工聯會噚日提出多項建議解決失業問題，包括喺綜援基礎上設立「緊急失業支援計劃」，為失業者提供為期6個月嘅...
詳情
相關新聞
