【Emily】呼籲選委投票 孫東出動廣東話
[2025.09.06] 發表
【明報專訊】聽日係選委會界別分組補選，將選出6個界別分組共21個席位，其中包括科技創新界、勞工界等，相關範疇嘅政策局噚日都喺社交平台呼籲選民投票，平時出席公開場合多數講普通話嘅創科局長孫東，噚日罕有地用「半鹹淡」嘅廣東話呼籲業界投票。
孫局長多年前嚟香港教書，之後參選立法會選舉當選，再加入埋政府，都甚少喺公開場合用廣東話發言。今次拍片講廣東話，雖然大部分內容由副局長張曼莉同政助廖添誠負責，但孫局長都包辦片頭片尾嘅部分，可見佢已經相當努力，為呼籲選民投票都誠意十足。
今次選舉需競逐嘅界別分組有商界(第三)；建築、測量、都市規劃及園境界；科技創新界；勞工界；港九三會同新界三會嘅代表。其餘21個界別，72個席位嘅候選人已自動當選。
更多港聞
相關新聞
