【明報專訊】無論乜嘢年紀，唔少人面對有關性嘅問題往往難於啟齒，但又會胡亂喺網上各種渠道搵「答案」，因而有可能接收到錯誤資訊。家計會話計劃為「e-輔導服務」引入年輕生力軍，特別培訓一隊有心、具備豐富性知識嘅青年做「網上輔導義工組」，年滿18歲就可以報名。計Emily話，一眾後生仔女不妨趁暑假做吓有意義嘅事。 家計會話，原來25歲或以下青少年好多時都關注驗孕、終止懷孕、緊急避孕等問題；21至30歲嘅求助者關心選擇避孕方法、婚前性行為、性功能障礙、終止懷孕等；30至40歲嘅就關心夫婦難孕或不育、家庭計劃、性障礙等等。 但解答求助者疑難，唔係報個名就得，取錄者要接受輔導技巧及性與生殖健康知識嘅訓練。一年任期內，將會負責回覆電郵，提供情緒支援同服務轉介等，解答服務使用者有關性與生殖健康嘅問題。有興趣嘅後生仔女記得本月底前向家計會報名喇。
|
| |
| |
