【明報專訊】民建聯立法會議員等一行34人噚日開始喺北京訪問，但無論係資深定係年輕嘅成員噚日個個「一臉疲累」，熊貓眼咁去拜訪部委同參觀，皆因佢哋前晚搭夜機去北京，但由於北京天氣唔好加上空管，令航班延誤差不多3粒鐘，佢哋去到酒店已經係凌晨4點，但6點半就morning call，即係最多瞓咗兩粒鐘，8點就出發訪問部委，唔怪得個個都唔精神喇。 Ann姐叉電 唔去小米總部 民建聯噚日先後拜會發改委、統戰部，下晝就去咗小米總部參觀，不過下晝參觀人數比較少，包括蔣麗芸(Ann姐)都無現身，有民建聯成員就話，佢哋頂唔順，要返去瞓晏覺叉叉電。 去到小米總部，民建聯一眾成員購物慾大爆發，唔少人買咗充電器配件，亦有人買視像鏡頭，話要喺屋企裝番部，睇住屋企嘅小朋友同寵物，唔少人都對小米電視好有興趣，但要搬返香港就比較難。 香港鉛水風波仲未平息，小米嚟緊就會推出一個聲稱可以過濾重金屬等嘅淨水器，民建聯鍾樹根似乎好有興趣，仲開埋水嚟睇，但當問到對方幾錢、有無得送貨等，先知原來過多幾日先上市，要買就要上網搶購嘞。
|
| |
| |
;){kind=small}
