【明報專訊】9月3日係抗日戰爭勝利70周年，中央會舉行閱兵儀式，特區政府會有約300人嘅觀禮團到北京，雖然特首辦至今仲未公布觀禮團名單，但唔少獲邀者已陸續收到通知。近日就有傳媒報道，前特首曾蔭權雖然獲邀，但佢就唔會去咁話，不過，Emily噚日向前任特首辦查詢，對方就回覆話煲呔曾「數星期前已接納邀請」，出席有關活動。 Emily再追問，邀請煲呔曾去嘅，究竟係中央政府定係特區政府呢？但對方喺截稿前都無再回覆嘞。 雖然閱兵係大事，但特區班子唔係所有人都去，Emily聽聞特首梁振英、政務司長林鄭月娥屆時都會去北京，但財政司長曾俊華就留喺香港唔會去。至於民政事務局長劉江華，由於到時香港都有唔少紀念活動，相信佢都要留喺香港。
|
| |
| |
