【明報專訊】83歲的洋服裁縫馮榮欣經歷過1970年代洋服業最風光的日子，年輕時他曾替張國榮父親、「洋服大王」張活海打工，後來行業式微，他不想手藝成為過去式，遂「晚年創業」，拉着自製「戰車」，流動為街坊修補衣服，衫褲改長短只收10元，更設上門交收。馮師傅「薄利多銷」，不為名也不為利，「我唔係為銀紙，我想保存以前所學嘅嘢。一二三十蚊我就好樂意同人做㗎喇」。
明報記者 劉嘉裕
在柴灣，你可能會見過馮榮欣。最矚目的是他的手拉車，車上寫滿「欣榮改衣，平益街坊」、「為人民服務」等字句，手寫字體與他本人一樣醒目。馮師傅家中露台有個小小工作間，放滿了五顏六色的線轆和數部舊衣車。
不為錢 改長短收10元
馮師傅為街坊改衫已經10多年，一向走薄利多銷路線，堅持自己的一套理論﹕「市面啲嘢咁貴，我有我自己平做畀你，慳自己唔慳人。我自己使費又唔大，一個老人食得幾多啊？如果你搵到啲錢，帶得入棺材咩？𠵱家咁樣晚年就會有好多人同我來往，有人同我溝通，仲可以走動吓。」
馮師傅育有3子，各已成家立室，妻子常常「管制」他，是他口中的「女強人」，但亦是「好幫手」。多年來，太太會幫他拆掉衣服的縫線，惟太太不贊成他平價改衫，認為他太張揚。「我晚年想將自己所學發揮出來，佢就覺得我樣樣都蝕畀人，好蠢，始終都唔明白我」，只因理念不同，兩夫婦常有矛盾。
馮師傅深信「一個人行運要靠另一個人引導」，他的伯樂是1960年代的「洋服大王」張活海，即已故歌星張國榮的父親。馮師傅當年結婚，都有邀請張活海去婚宴。馮師傅回首當初，記得少年的張國榮時不時在店內流連，更會幫父親送洋服。
馮師傅曾兩度為張活海工作。廿歲出頭時，他工作上遇到張活海，被邀請到張活海的工場做褲。後來馮想趁年輕出外學做上衣，沒有親口向張活海道別，只留下一封信：「期之以日，再效犬馬之勞」。片言隻字表達了馮師傅感謝張活海的知遇之恩，亦留了後路。
曾轉行駕小巴 退休做回本行
3年後，學會了做上衣，張活海的洋服店等人用，馮師傅向張活海自薦加入做上衣，結果這次便成了張的左右手，「佢又幫我、我又幫番佢，成日同佢解決困難。日以繼夜趕工，一晚通宵就幫佢做咗件大褸」。十多年過去，張活海的洋服店結業，馮師傅放下衣車，轉行當政府洗衣工，其後全職駕小巴直至退休。
兜兜轉轉，馮榮欣晚年還是選擇做回老本行，笑說手工不及從前，「手又硬腳又硬，做出嚟係無以前咁精細」。
問馮師傅這工作模式會持續多久，老人家不諱言：「呢次做呢行，永不退休，做到死為止！」
;){kind=small}
;){kind=small}
;){kind=small}
;){kind=small}
