【明報專訊】即將卸任立法會議員嘅「民主思路」召集人湯家驊(Ronny)透露，打算寫自傳講吓從政經歷，但起碼要2016年後先會面世，因為佢唔希望喺立法會選舉年出書，避免被人誤會要借自傳攻擊別人。 Ronny嘅辭職10月1日正式生效，佢同Emily講，目前仍有人勸佢收回成命，希望佢繼續做議員。但Ronny表明唔會動搖，因為辭職嘅決定唔係一時三刻，係一個諗咗好耐嘅決定。Ronny目前專注「民主思路」嘅工作，佢話未來會喺四方面做研究工作，包括中國假想、一國兩制、身分認同、政改問題。 「民主思路」開張唔想切蛋糕 7月時，一眾政治記者為Ronny搞咗個歡送會，仲送上一個3D立體蛋糕。Ronny笑言「民主思路」今個星期日「新舖」開張，有人建議可以買個立體蛋糕慶祝，但Ronny話唔想整個湯家驊立體公仔嘅蛋糕，更加唔好整個立體基本法蛋糕，因為將基本法切開係好大鑊。佢話，都係傳統啲，到時切燒豬算喇。
|
| |
| |
