【明報專訊】政府噚日公布新一屆公共圖書館諮詢委員會嘅成員，當中有7個新成員，包括民主黨元朗區區議員、本身係愛情小說作家嘅鄺俊宇。Emily噚日問鄺俊宇對圖書館運作同入書方面有乜睇法，佢話自己係公共圖書館非常草根嘅用家，平均每星期都會去圖書館一至兩次，主要去寫稿。作為用家，佢就對圖書館發展暫有兩個意見：一係想加多啲插蘇「叉電位」，二係唔好入簡體字嘅書。 鄺俊宇都出過幾本愛情小說，有唔少粉絲，Emily問佢有冇心水書籍希望公共圖書館可以提供，估佢唔到嘅係，佢覺得衛斯理同金庸小說仍然係必然選擇，話呢啲都係香港嘅小說。至於電子書，喺網上寫小說爆紅嘅佢就話，都係鍾意實體書多啲，認為圖書館都係提供可畀巿民「拎起手」嘅實體書比較實際。鄺俊宇話，據佢所知，委員會每4至5個月先開一次會，要等開咗第一次先再研究研究有乜具體建議。 除咗鄺俊宇，另外6個新成員係陳麗霞、何蘭生、洪錦鉉、羅乃萱、蘇家碧同黃沛琳。成員會向政府提供意見，包括圖書館設施同服務發展；中央圖書館角色、功能同管理；點樣推動閱讀風氣等；任期至2018年4月底。
|
| |
| |
