【明報專訊】12月對學生嚟講絕對係又愛又恨，有長假期之外，亦有一連串考試同功課，大學生更要面對海量projects同一堆死線，壓力自然唔細。中大《大學線》早前訪問咗360名大學生，有92%話自己有學業壓力，當中約三成半人出現唔同程度嘅抑鬱徵狀。 《大學線》喺上月尾，以非隨機抽樣方式喺港大、中大、科大、城大、理大同浸大派發共360份問卷，亦加入「病人健康狀况量表」，量度受訪者喺過去兩星期出現受壓徵狀嘅頻率，以評估受訪者嘅抑鬱狀况。調查結果發現，話自己有學業壓力嘅受訪者中，約三成半人出現唔同程度嘅抑鬱徵狀，包括輕度抑鬱(22.9%)，中度抑鬱(8%)同埋嚴重抑鬱(3%)，其中最常見嘅徵狀包括「做任何事都覺得悶，或根本唔想做任何事」同「覺得疲倦或活力不足」。 最大成因係考試壓力 另外，大學生壓力嘅最大成因，最多人揀嘅係考試壓力，其次係將來就業同課業壓力。《大學線》訪問咗個同學，佢話對自己要求高而出現焦慮症。佢要求自己GPA過3(最高為4)，又要上莊搞活動，每日瞓得三四個鐘，加上之前出現家庭問題，諗過自殺，最後去學生輔導處接受心理輔導，直至學期完先好轉，仲奉勸各位同學唔好勉強自己，攰就要唞吓啦。
|
| |
| |
