【明報專訊】新一屆選舉委員會選舉周日(11日)舉行投票日，但點解有啲高教界選民話，至今都未收到投票通知卡？選舉事務處噚日下午發出新聞稿，話已經向23萬多名選民寄出投票通知卡，但發言人回覆Emily時承認，最後一批通知卡喺上周五(2日)先寄出，強調有按照一如以往嘅選委會選舉安排，按法例喺投票日前5天或之前發送相關資料。 可網上翻查選民資料 選舉事務處嘅新聞稿提到，選舉郵件除咗附有投票通知卡，仲有指定投票站嘅位置圖、投票程序、所屬界別分組候選人嘅簡介，又提到今次選舉有12個界別、1個小組合共300名候選人自動當選，所以該處無向該界別分組內嘅1.1萬名選民發送相關資料。 發言人又提醒，如果投票人仲未收到通知卡，可以透過網上系統(www.voterinfo.gov.hk)翻查，以確認自己係咪已登記選民，同埋查閱自己獲編配嘅投票站。 料通宵點票 特色美食供應傳媒 周日投票日，全港會開放110個一般投票站，投票時間為上午7點半至晚上10點半；選舉嘅中央點票站設於機場亞洲國際博覽館。 亞博館方面仲話預計會通宵點票，所以特別喺6號展館「新聞中心」設置休息區，為傳媒全天候供應免費飲料、特色美食咁話。
|
| |
| |
