【明報專訊】現時政壇充斥口水戰，乜嘢情况下應該「不予回應」都需要學習，立法會前主席曾鈺成就撰文分享自己以咩原則回應對佢嘅批評。曾鈺成提到其中一種批評者唔係針對佢文章嘅對錯，而係質疑佢嘅動機，例如「我批評CY，是因為我要爭做特首」，曾鈺成話，面對呢類指控，「如果回應，豈不玷污了紙筆(或鍵盤)？」 曾鈺成噚日喺《am730》專欄撰文，話自己甚少回應對佢文章嘅評論，強調唔係因為對呢啲評論置若罔聞，更指面對批評意見會抱住「凡攻我之失者，皆我師也」嘅精神，認真反省查找錯誤同不足。 曾鈺成話對佢嘅批評大致可分為三類，第一類係唔同意佢嘅立場或觀點，面對呢啲批評，佢會研究對方講嘅係咪有道理，如果發現對方確實指出咗自己嘅缺失，「我便悄悄地接受他的意見」。至於第二類批評係對佢文章有誤解或者有意歪曲，曾鈺成話呢類批評再解釋都無用。第三類批評就係質疑佢嘅動機，例如一旦佢講特首林鄭月娥，就會質疑佢「選不成特首，酸葡萄」，曾鈺成話，如果回應呢類指控「豈不玷污了紙筆(或鍵盤)？」
|
| |
| |
