【明報專訊】一連4日嘅「香港電腦通訊節2017」噚日(25日)開鑼， 約有200個參展商同約400個攤位。排頭3位等入場嘅都係學生哥，佢哋前日(24日)已經去到會展，足足排咗21個鐘，目標搶購限量10部嘅手提電腦。 2號籌同學1蚊買伺服器 應屆DSE畢業生周同學同老友魏同學前日(24號)中午1點開始排隊，排頭位嘅周同學成功用825元，買到原價5990元嘅手提電腦，足足平咗5000！佢話自己一個禮拜前就做定資料蒐集，貪呢部手提電腦夠平，希望以後「做project(報告)都方便啲」。佢仲話，一早準備好垃圾膠袋同報紙，準備露宿一晚，佢仲話如果落雨都會堅持排隊。 拎2號籌嘅魏同學一入場就直衝目標，最後成功搶到限量一部嘅「1蚊伺服器」，佢覺得自己好幸運，又形容「購物之旅圓滿結束」。至於升中四嘅陳同學拎到3號籌，話為咗嚟電腦節儲咗成個月錢。 參展商：料比上年最多賺多10% 參展商聯想(Lenovo)負責人黎先生滿意人流，但就因為市道差，唔寄望賺大錢，「做到上年咁都好叻」，佢估計今年比上年最多賺多10%。 黎先生話，喺電腦節買電腦最正係送勁多贈品，買一部機就送20幾樣禮物，包括喇叭、充電線同滑鼠等，都值過千元架。Emily就覺得，啲禮物啱用咪抵囉，唔啱用就係另一回事。
|
| |
| |
;){kind=small}
