【明報專訊】聯合國兒童基金香港委員會(UNICEF HK)11月底舉辦慈善跑，呢類賽事主辦單位都會向參賽者分發號碼布識別，大會今次就搞搞新意思，開放咗150個名額畀捐款達一定金額嘅跑手，喺001至999嘅號碼中自選數字，另外亦有部分「特選號碼」，例如288、888、999等，畀善心跑手競投，價高者得。 噚日記者會大會搵嚟唔同界別名人分享揀號碼心水，亞運體操金牌得主石偉雄揀咗210號，意思係兩個「10」，因為佢10月10號生日；亞運劍擊銅牌得主林衍聰揀咗823，因為8月23號係佢取得銅牌、成功求婚日子，形容呢日標誌住佢生命另一重要階段開始。UNICEF HK大使李慧詩則以佢喺體院房間號「937」作為其號碼。 商界公關、人稱「水哥」嘅馬拉松達人張樹槐就揀咗100作號碼布，希望藉此鼓勵自己，達成?未來3年要完成第100個馬拉松嘅目標。UNICEF HK總幹事劉玉燕話今次慈善跑唔止可以支持該會全球抗愛滋運動，參加者亦可藉個人號碼布為參賽增添獨特意義。
|
| |
| |
