【明報專訊】「山竹」來襲令全港活動幾近停頓，政界同樣受影響。工黨喺周日(前日)原本召開黨員大會，討論推薦劉小麗出戰11月立法會九龍西補選，不過當日10號風球掛足10個鐘，大會要推遲一星期到嚟緊嘅周日(23號)先舉行，而大會只係推薦劉小麗參選，並非代表佢正式參選。 補選提名期10月2日展開，噚日有報道指劉小麗最快今日宣布參選，有工黨中人向Emily澄清，今日原本只係打算啟動收集參選提名活動，但由於風暴關係，活動最快要星期四先開始，但強調屆時尚未正式宣布參選。 另一邊廂，已退出民協嘅馮檢基本月5日喺傳媒茶敘講過，話民主派應喺10日內為九龍西補選舉行初選，否則會「再考慮自己角色」。10日已過，民主派至今無意舉辦初選，咁基哥會唔會去馬參加補選呢？佢前日喺山竹來襲時，透過短訊同Emily講「過咗個風傾」，佢噚日就透露呢一兩日會約傳媒傾傾咁話。
|
| |
| |
