【明報專訊】近日表態話有興趣參選特首嘅新民黨主席葉劉淑儀，噚日喺商台節目《鈺成千里目》透露自己曾經「裸辭」，仲形容當時自己好無禮貌，太過天真「炒老細魷魚」，最終留番喺度係執番身彩。 葉太話，佢喺1975年加入政府，首個職位就喺銓敘司度做嘢，即相當於現時嘅公務員事務局，負責處理公務員紀律事宜，包括出信通知公務員被停薪、停職甚至「炒魷魚」。由於當時正值廉政公署成立初期，唔少公務員因貪污被判刑，佢經常負責撰寫寄往英國嘅文書，要求英國政府罷免有關公務員嘅任命，因此成日畀公務員責罵。 麥高樂叫「收番封信」 執番身彩 後來佢覺得工作負擔太重「做唔掂」，於是向當時上司麥高樂請辭，葉太形容自己當時「好無禮貌」、「唔係幾識人情世故」，因為如果工作上有困難應該搵老細傾，但佢就選擇突然交信，因此麥高樂收到信後「黑口黑面」，仲持續咗成個星期，最後麥高樂召佢入房問佢搵到工未，葉太話「無啊，未有打算」，於是對方叫佢「收番封信」。葉太話，當年事後諗起都覺得留番喺政府算係執番身彩。 葉太喺銓敘司做咗3年後申請調組，之後調去民政事務總署，曾經策劃旺角起地鐵；1980年代任職首席助理政務司，負責首屆地方選舉，並得到當時港督麥理浩讚揚，至今佢仲保存麥理浩封表揚信。
|
| |
| |
