【明報專訊】政府先前話因為社會未有共識，所以性傾向歧視立法遙遙無期，中大喺8月做嘅調查就顯示，受訪者對支持同志平權嘅商業機構其實唔係咁抗拒。 中大新聞與傳播學院嘅傳播與民意調查中心喺8月初電話訪問咗1013名市民，結果顯示，如果有商業機構公開表明支持性傾向歧視立法，31.6%受訪者對呢間機構態度正面，38.5%受訪者保持中立，29.1%就態度負面。如果間公司贊助同志遊行，49.9%受訪者保持中立，21.5%就對公司有正面印象，有26.7%就印象負面。 學者﹕撐平權唔使太擔心 換個角度問，若有公司公開反對性傾向歧視立法，就有48.7%受訪者會對呢間公司有負面或非常負面嘅印象，只有15.5%受訪者嘅態度會係正面或非常正面。中大性別研究課程助理教授孫耀東喺研究總結度提到，觀乎結果，有意公開支持同志平權嘅商業機構，未必需要擔心咁做會為佢哋帶嚟如想像中強烈嘅公眾反彈。
|
| |
| |
