【明報專訊】海洋公園今年40周年，於下月17日起挑選咗19日，推出「夜間美酒佳餚盛薈」夜場門票，遊客以最少168元喺特定日子於下午5時後入場，可聽迷你音樂會，仲可以暢飲手工啤。 今次活動分為3個主題，其中「清酒嚐味祭」於3月17日至19日、24至26日舉行，遊人可以飲多款清酒；「Chill爽啤酒音樂夜」於3月31日至4月4日、4月7日至9日舉行，到時會有唔同款式手工啤，每晚仲有兩場音樂會，其中Supper Moment會喺4月3日第二場音樂會表演；4月13日至17日就會有「星級美酒佳餚薈」，到時有多款得獎或米芝蓮星級餐廳同埋名廚主理嘅菜式。 門票分3款，普通門票每張168元，有一杯雞尾酒式特飲、50元現金代用券，仲可以聽迷你音樂會等，每日限量數千張。另一款係「尊尚門票」，每日限量百幾張，分為688元、788元兩款，可到貴賓區。海洋公園話，門票將於2月20日起分階段發售，詳情稍後公布，若當日門票賣晒，網頁會即時公布。
|
| |
| |
