【明報專訊】林鄭月娥以777票勝出特首選舉，競選辦上下辛苦咗兩個幾月，終於可以唞吓。噚日下晝約4點鐘，林太就同競選辦成員喺會展旁邊嘅君悅酒店內book咗間房搞小型慶功宴，約50至60人出席。出席嘅包括林太丈夫林兆波同大仔林節思、一班競選辦成員，以及信和置業主席黃志祥等。 有與會者同Emily講，林太喺宴會上開香檳慶祝，而呢兩個幾月車佢周圍去嘅司機及政府分派嘅G4警員，都獲邀出席，林太亦逐一致謝同合照，搞到要有人提醒，畀全日無食過嘢嘅林太食吓三文治先。 CY前研究助理站背後 慶功宴低調舉行，歷時個幾鐘，據聞席間有人向林太老公林兆波講，希望佢日後都多啲出席呢類應酬宴會，笑言今次選舉咁大場面都見過啦，但似乎林兆波都比較低調喎。林太都好體貼，話夜晚要預留時間陪吓老公同阿仔。 林太勝選，背後團隊功不可沒，Emily發現噚日其中一個陪同林太見記者、企喺佢背後嘅女人，就係當年曾經幫梁振英參選特首嘅政策研究助理楊容容(Rosy Yang)。Rosy來頭不小，曾就讀聖保羅男女中學，2008年考獲8A同兩科5*，之後去英國牛津大學及美國普林斯頓大學深造，2013年底加入特首辦做研究主任，據聞早前已離開政府。唔知林太當選後，Rosy會唔會再重投政府呢？
|
| |
| |
;){kind=small}
;){kind=small}
;){kind=small}
