【明報專訊】電動方程式錦標賽(Formula E)將喺年底12月重臨香江，中西區區議會文件顯示，中環新海濱一帶嘅民耀街、耀星街、龍和道等，將會喺11月23號起分階段封路，以便安裝混凝土安全護欄、賽道圍欄、看台等設施。途經嘅巴士、小巴等都會有相應嘅改道，大會將喺11月起公布改道安排，市民要留意喇。 本月登記抽免費e-Village門票 Formula E會喺12月2至3號舉行，賽道同舊年一樣，圍繞民耀街、耀星街、龍和道，全長1.86公里。舊年唔少市民都話門票貴，無去現場感受氣氛，大會今年將e-Village區域門票，由舊年收300元，改為免費派畀市民，市民如有興趣，可以喺今個月30號或之前，到ballot.hkformulae.com網站登記，大會將喺10月9日起抽籤，直至派晒2萬張免費門票為止。 至於三大主看台門票，今年嘅單日門票收2380至2880元不等，添馬公園主看台可以睇到車手點過髮夾灣，票價就比舊年貴咗500元，其他嗰兩個看台就不變。
|
| |
| |
;){kind=small}
