【明報專訊】由解放軍駐港部隊主辦嘅第14屆香港青少年軍事夏令營，噚日正式開營。Emily噚日一早入去沙頭角新圍軍營，見到500個著住整齊迷彩制服嘅學員坐定定等開營，佢哋會由噚日起直到29號，接受兩星期解放軍嚴格訓練，體驗點樣「做兵」。主辦單位今年仲係第一次招收初中生入營，由細培訓佢哋嘅國民意識。有學生話自己「本身都好愛國」，唔擔心被「洗腦」。 200中一二生 受訓5日 香港青少年軍事夏令營係由特區政府、香港群力資源中心同駐港部隊聯合主辦，目的係幫助香港嘅青少年認識解放軍，學吓基本軍事技能，增強國防觀念同民族意識。今年夏令營共有500個香港中學生入營，包括270個男生同230個女生。 夏令營籌委會主席郭澤偉話，有家長同學生反映，話希望初中生都有份體驗軍訓，所以今年主辦單位第一次招募中一、中二學生，有成200人咁多，而佢哋嘅受訓時間會濃縮至5日。 盧偉聰歐陽震華入營分享 入營嘅學生會接受步操、體能訓練，仲會去昂船洲、石崗軍營參觀軍艦同軍事直升機。籌委會仲邀請咗警務處長盧偉聰同藝人歐陽震華入營分享。 喺香港出世、準備升中五嘅蘇美雲同學話，以前無機會體驗軍訓，覺得今次機會難得，佢最期待參觀軍艦。本身係童軍嘅佢又話，知道解放軍同其他制服團隊唔同，例如步操方式，話唔擔心被「洗腦」，因自己「本身都好愛國」，唔覺得主辦者會灌輸特別信息。 喺內地出世、準備升中四嘅潘淳子同學話，參加夏令營係為咗令暑假過得充實啲，「唔淨止喺屋企打機」。佢話最期待嘅係步操訓練，因為覺得解放軍步操時好整齊同埋莊嚴。被問到擔唔擔心軍訓期間畀人「洗腦」，潘同學就話自己思想已經成熟，唔會咁容易畀人影響嘅。
|
| |
| |
;){kind=small}
