【明報專訊】食環署公布今年首輪「目標小區滅鼠行動」，8星期喺超過2.5萬處放毒餌同捕鼠器，捉到約1800隻活鼠同死鼠，平均14個地點捉到一隻，但署方喺新聞稿形容行動「取得成效」，建制派議員叫食環署檢討點解行動雷聲大雨點小，仲話應該發動「全民運動」！ 建制叫發動「全民運動」 民建聯議員柯創盛批評食環署咁大力度出擊8星期，但捉到嘅老鼠太少，行動力度同成效不成正比，係雷聲大雨點小。柯仔叫食環署全面檢討係咪做漏嘢，強調滅鼠要持久戰，單靠「特事特辦」短期行動只會「有頭威無尾陣」。 柯仔要求食環署改善山坡同領展範圍滅鼠同控蚊工作；又建議大力宣傳，加強市民舉報鼠患嘅意識同方法、研發舉報鼠患黑點嘅手機程式，要發動全民參與滅鼠運動咁話。 食環署喺5至6月做今年首輪「目標小區滅鼠行動」，8星期內喺7227個地點放毒餌，另喺約1.85萬個地點放捕鼠器，毀滅390個鼠洞，收集咗1035隻死鼠同捕獲793隻活鼠，平均14個地點捉到一隻。
|
| |
| |
