Color Run粉人周圍走 「最快樂跑」安排被批

Color Run粉人周圍走
「最快樂跑」安排被批

[2014.12.08] 發表

【明報專訊】自稱「最快樂的5公里跑」嘅體育活動The Color Run，以一邊跑一邊掟七彩粉末為賣點，噚日喺機場亞洲博覽館外舉行，大會話有16,000人報名，場面熱鬧。但開心過後，有人話大會安排混亂，而成身七彩嘅「粉人」，散場後走去機場廁所洗身、走上港鐵等，搞到粉末飛揚好污糟喎。

保管財物者被指不足

有參加者玩樂亦不忘抗爭，有人帶埋黃遮撐場，亦有人背脊貼上「我要真普選」貼紙。參加者馮小姐話，原來慈善跑善款受助機構包括親建制組織「東涌安全健康城市」，報完名先知「中伏」，但畀咗錢，唯有「勿忘初衷」，「嚟玩都要抗爭！」

但係有參加者玩完唔太高興，投訴主辦單位邀請一班女童軍協助保管財物，但參加者太多，人手唔夠，最後參加者要自己喺一大堆背囊、手袋中間搵番個袋，覺得可以改善保安安排。

有參加者同Emily講，賽道得一條行車線加一條行人路咁闊，途中有4個地方灑彩粉，佢哋個個都留喺度碌地沙唔願走，等咗20分鐘先成功「開路」，結果行路多過跑步，完場時用會場嘅大風扇又吹唔走身上彩粉，最終成個紅噹噹嘅關公咁返屋企。有參賽者去咗機場洗手間清洗，結果有網民喺活動官方facebook留言，話唔滿意有人搞到洗手間好污糟。

機管局就確認有參加者去廁所清洗，但話機場係公眾地方，人人可以使用。不過，大會有提供透明便利雨衣畀參加者著住離開，避免粉末飛揚。

Emily就住呢啲安排問題問過主辦單位，至截稿前未獲回覆。