【明報專訊】《施政報告》提出要扶助戲院業，根據噚日商務及經濟發展局回應工聯會議員鄧家彪提問，原來香港戲院由2005年嘅57間，跌到去2014年得番47間，即係平均每年減少1間，總座位數目就少咗25%，由超過5萬個座位減到3.7萬個。雖然部分旺區例如油尖旺、灣仔區都有唔少戲院，但深水埗、大埔同北區呢3區目前係完全無戲院㗎。 深水埗大埔北區無戲院 據商經局提供嘅18區戲院數目，油尖旺區同灣仔區最「鬆動」，油尖旺共有12間戲院提供近1.1萬個座位，用舊年統計處嘅區內人口計算，平均每29人分享一個座位；灣仔區都唔弱，有5間戲院、2351個座位，平均每64人分享一個座位。相反，葵青、元朗同沙田區分別要387人、592人同678人分享一個戲院座位，買飛就難啲。 鄧家彪問政府有乜嘢具體措施支援院商喺無戲院地區起戲院，商經局就話商業電影院選址係商業事宜，要由院商自己決定，政府不宜介入，但鑑於個別地區居民有需求，當局都會同相關部門探討，睇吓點樣增設及提升戲院設施，方便市民睇戲。
|
| |
| |
;)
