馬會資助足總培訓足球小將
[2015.08.25] 發表
【明報專訊】Emily不時都會留意吓體壇消息，噚日香港足球總會宣布賽馬會慈善信託基金資助咗1.2億港元，畀佢哋推出5年足球發展計劃，由今年7月到2020年6月期間培訓足球小將，最細連4歲嘅小朋友都可以參加，每年會有26,000個青少年球員受惠。
除咗訓練兒童同青少年之外，足總打算發展女子足球同五人足球，仲會成立聯賽𠻹。另外，計劃亦包括培育本土裁判員同教練，同埋請專業體能教練，監察球員體能同技術表現。
足總話政府嚟緊每年亦都會投放約4300萬港元支援其他配套措施，足總行政總裁薛基輔話，期望會有更多硬件配合番個計劃，又話足總嘅將軍澳足球訓練中心，約喺2017年或之前落成。另外，即將喺沙田開幕嘅賽馬會傑志中心，除咗畀球員訓練之外，有三成時間都畀到市民預約去踢波。
更多港聞
相關新聞
