聽過C AllStar版本 曾俊華鍾意《憑著愛》旋律
[2016.02.25] 發表
【明報專訊】財政司長曾俊華噚日發表預算案，近幾年佢都鍾意借歌詞抒發感受，今年唔例外，引用1980年代台灣歌手蘇芮嘅金曲《憑著愛》，話香港人「曾踏遍刺腳的彎路」，乜嘢都經歷過，曾經跌倒，最後都能夠找到出路。佢噚晚出席預算案論壇時就解釋，自己鍾意音樂，每次電台請佢去做DJ佢都好開心，可以揀吓歌，佢話《憑著愛》嘅旋律好特別，令大家都好鍾意。
郭榮鏗用番甘迺迪名言批評
曾俊華話，預算案用過《天各一方》、《交叉點》、《隨想曲》嘅歌詞，笑言或者係講畀大家聽自己有幾老餅。不過佢亦立即顯示潮嘅一面，話鍾意蘇芮嘅唱腔，去年亦有聽過組合C AllStar同林一峰、林二汶翻唱嘅《憑著愛》輕快版。
預算案亦引用咗美國前總統約翰．甘迺迪嘅名句「我們的問題是人為的，所以人自然有方法將問題解決」，呢番話係甘迺迪喺1963年10月於一間大學講嘅，當時美蘇冷戰，佢演講談及和平，話有人覺得戰爭無可避免，但甘迺迪就覺得人為問題總有方法解決。
提一帶一路 財爺6次特首40次
但泛民就似乎唔buy財爺咁引述喇，公民黨郭榮鏗就用甘迺迪另一名句回應，批評預算案未有處理社會分配不公，郭話：「如果一個自由社會無法幫助多數的窮人，它亦無法拯救少數的富人(If a free society cannot help the many who are poor, it cannot save the few who are rich.)。」
另外，特首梁振英喺《施政報告》提及「一帶一路」約40次，曾俊華喺預算案度，「一帶一路」連埋標題約出現咗6次。
更多港聞
【明報專訊】曾經多次不諱言大談「本土意識」嘅財爺曾俊華，噚日喺《2016/17年度財政預算案》中繼續展示「貼地」形象，多番提及香港人精神，又...
詳情
校委守則只列「利益衝突離場」 校委柯天銘﹕逐馮敬恩加劇兩極
【明報專訊】香港大學本科生校委馮敬恩前日於校委會會議上，因拒絕簽署不採取行動影響校委或相關者安全的承諾書，校委會投票大比數通過要求他離開。民... 詳情
相關新聞
