【明報專訊】鄉事派同民建聯關係麻麻已經唔係秘密，而啱啱舉行嘅立法會新界東補選，更鮮見以往一車車鄉紳去投票嘅情况。上水區鄉事委員會主席侯志強出席網台節目時就話﹕「(選舉日)我瞓到夜晚11點先起身，瞓到天昏地暗，瞓醒都唔知乜嘢事！」節目主持人李慧玲問佢，係咪自己連票都冇去投，侯志強就冇否認。 今次補選，周浩鼎以1萬票之差輸咗議席，被問到鄉議局有無幫手拉票，侯志強就話，鄉議局冇咁大功力去幫人㗎，又話「我不嬲都話自己冇乜鬼用，拉票喎，拉牛咩！」對於有評論指鄉事派唔夠熱心支持，侯志強就答「你話人冇幫你，咁你有冇主動叫人幫你？咁鬼多人，人哋點知幫邊個？」 李慧玲去年底已經離開《蘋果日報》，在網台D100客串主持早晨烽煙節目主持。佢就問侯志強，鄉議局成立嘅新黨會唔會參加9月立法會選舉？侯志強就話，「如果唔選，成立黨係做乜？……香港好多男仔，點會搶晒你啲男朋友？大家唔同品味，冇話邊個搶咗邊個啲票。」
|
| |
| |
;)
