【明報專訊】傳聞香港大學大學堂(U-Hall)有三寶，就係銅梯、四不像同「三嫂」，呢位三嫂正正係喺U-Hall服務超過40年嘅服務員袁蘇妹，今年適逢佢九十大壽，歷屆宿生早前製作咗一段短片，當中輯錄三嫂同咁多個宿生嘅宿舍生活舊照，仲為佢準備一個金壽桃，祝三嫂壽比南山，歲歲平安咁話。 當愛情顧問 叫男生「對女友好啲」 大學堂facebook早排分享咗呢段賀壽短片，介紹三嫂喺大學堂工作超過40年，做過四級廚師、助理廚師同宿舍服務員等職務，呢位宿舍「靈魂人物」除咗照顧宿生起居飲食，都關顧到男生身心健康成長，畀佢哋支持同鼓勵。三嫂喺1998年榮休，仲喺2009年獲得港大頒授名譽大學院士，當時仲大讚佢係「U-Hall仔」嘅家庭顧問、學業同就業顧問， 甚至係愛情顧問，因為三嫂好多時對學生講：「你個女朋友好好，你要對人哋好一啲。」有U-Hall老鬼結婚，佢都會去飲一杯「新抱茶」㗎！
|
| |
| |
;){kind=small}
;)
