【明報專訊】社民連立法會議員梁國雄(長毛)日前宣布，如果拎到3.8萬個公民提名就會參選特首；平日喺議會不時同長毛鬥嘴嘅民建聯立法會議員蔣麗芸(Ann姐)話，如果長毛拎唔到民主派選委150個提名，「我勸你同呢班人(泛民選委)割席，以後改邪歸正，唔好拉布同搞搞震」。 Ann姐噚日喺facebook上載短片，透露個幾月前喺立法會嘅電梯口見到長毛，長毛當時同Ann姐講「你會唔會提名我」。Ann姐笑言當時覺得好愕然，心諗長毛咁夠膽出嚟選特首，自言「上天賜我好生之德」，所以當時無一下子打殘長毛，淨係同長毛講「向你嘅同路人拎夠提名先啦」。 Ann姐話長毛要拎3.8萬個市民提名應該唔難，指單係新界都有300幾萬市民，3.8萬個提名只係1%市民，「假如你真係攞唔到(3.8萬提名)就唔該你唔好做議員，辭職算喇」。Ann姐仲建議，如果泛民唔提名長毛，長毛就應該同泛民割席，改邪歸正，唔好拉布搞搞震。
|
| |
| |
;)
