【明報專訊】特首梁振英早前講過，南風天將香港污染物吹去廣東等城市造成霧霾，引嚟天文台前台長李本瀅寫文反駁，批「政府不重科學，欠科學常識」。事隔半個月，李本瀅又撰文，但今次開宗明義自嘲「欠政治常識」，所以只可以繼續講科學常識，教市民「空氣污染自衛攻略」。 李本瀅日前喺網誌話，之後睇過BBC短片教人點樣可以減少吸入污染，佢因應香港情况，教授市民自衛攻略。佢話一般而言大街車輛較多，污染排放自然較高，因此行車較少嘅橫街小巷會較好；但如果要喺街上行，就要喺安全情况下盡量遠離車輛。 行斜路揀車輛下坡嗰邊 若要行斜路，就要喺安全範圍內，選擇車輛下坡嗰邊嘅行人路走。因為車輛上斜時，能源消耗比較大，污染量自然較多。 至於喺馬路邊走，到底行有簷篷定無簷篷嘅路比較好？李本瀅指一般而言無簷篷嘅位置會比較好，因為簷篷會阻礙污染物往上擴散，變相令地面污染濃度增加。佢同時強調，行路時一定要顧及自身安全。
|
| |
| |
;)
