【明報專訊】教聯同教協噚日分別喺上晝同下晝開記者會，講對《施政報告》嘅建議，Emily以為兩個會一早夾好費事撞時間，但教協總幹事馮家強喺facebook炮轟教聯會「乜都抄」，連開記者會都要抄，質疑教聯係咪驚自己搞記招無記者理，或者想刻意冲淡老師聲音。 Emily於是問番兩會，馮家強話唔係第一次發生呢種情况，4月佢哋開記者會講教育新資源建議時已經係咁，教協發出採訪通知無耐，教聯又同傳媒講同日見記者講同一話題。 教聯會主席黃錦良一聽到教協話佢哋抄襲就好激動，解釋一直有鋪排開記招，加上開學後個個都忙，先盡快搞記招，反問﹕「佢定咗呢一日，咁其他人唔做得？」佢又話上次教育新資源記招，佢哋下晝舉行，記協上晝做，教聯都無意見，批評教協「所以咪小器囉」。 兩次均教協先出通知 Emily搵番兩會公布記招時間，4月教育新資源嗰次，教協4月19號約下晝3點15分發信息，喺4月20日開記者會；而教聯會喺19日4點04分傳出，公布20日開。噚日記招，教協前日下晝約2點05分發通知，公布開記者會；教聯前晚6點36分先通知，公布噚日朝早開記招。Emily好好奇，點解又會咁啱教協發完信息，教聯就出通知，仲要同一日搞之餘，時間又無撞呢？
|
| |
| |
;){kind=small}
;)
