【明報專訊】香港郵政每年都會推出特別郵票，噚日就公布2018年郵票發行同訂購詳情。明年係戊戌狗年，會推出以靈犬為主題嘅生肖郵票，面值由2元至5元不等，另設「金雞靈犬」小型張，以銀箔同22K鍍金金片製作；其他特別郵票包括金庸小說人物、香港消防150周年等。 狗年郵票由著名設計師靳埭強設計，以瓷器、玉器、陶土玩偶同貝殼工藝嘅靈犬作造型，帶出狗仔活潑一面。系列仲有埋利市封，鍾意儲利市封嘅朋友又可以集埋一份。 其他特別郵票中，Emily覺得最吸引嘅係金庸小說人物系列，由有「金庸御用畫家」之稱嘅李志清操刀，畫出極具神韻嘅經典人物，例如楊過、小龍女、郭靖、黃蓉、韋小寶同張無忌等。不過呢套郵票喺2018年壓軸出場，訂咗都要明年底先有得拎。 除咗傳統事物，出年仲會有「共融溝通」系列，藉此推廣手語同點字，郵票上印有常用手語詞動作，好似「朋友」、「你好」、「加油」等，加上相應點字。另外，明年適逢本港消防服務踏入150周年，特別郵票亦推出消防系列，印有一架架消防車，用色特別，非常吸睛。
|
| |
| |
;){kind=small}
;)
