林鄭：老公唔敢做嘢 留喺屋企
[2018.01.12] 發表
【明報專訊】特首林鄭月娥噚日出席立法會答問大會時，自爆老公林兆波𠵱家唔敢做嘢，留喺屋企。林太仲話，擔心日後好難搵人做政治任命官員，因為一旦入政府，有可能影響到家人嘅生意。
回應有關潘樂陶提問有感而發
資訊科技界議員莫乃光會上話，律政司長鄭若驊嘅丈夫潘樂陶，其公司接嘅政府工程每年隨時可以係數以億計，問政府可以點樣保證外判工程可以得到正確、公平嘅處理，「你會唔會亦要求潘先生嘅公司以後唔再做政府工程？」
林太回應時話，如果市民聽到莫乃光呢番話，日後好難搵人做政治任命官員，因為把火燒到家人、燒到家人自己企業嘅生意。林太強調有招標制度、有廉政公署及好多制度保障，仲話如果司局長嘅配偶本身自己有合法嘅工作，但因為家人做官就要佢咩都唔做留喺屋企，「得一個人可以，可能就係我老公，我老公𠵱家唔敢做嘢」。
另一方面，自由黨邵家輝問，政府可以點樣將油麻地果欄打造成旅遊景點，活化整個果欄。
活化果欄稍後有詳細建議
林太話果欄當中有一啲歷史建築，亦係市民集體回憶，透露政府已經做緊嘢，將果欄變成一個有本地經濟、又方便零售同吸引遊客嘅地方，稍後就有詳細建議，又叫邵家輝可以搵民政事務局長劉江華問吓。
更多港聞
九龍寨城為靈感 併縫牛仔布 薩凡納生誓創反映基層時裝
【明報專訊】牛仔布起源自工人階層，時至今天，已十分廣泛使用。有設計學系畢業生以牛仔布作為畢業設計作品，期望藉布料反映勞動階層的面貌，更認為社... 詳情
【明報專訊】著名華語文學家白先勇將於本月底至下月初親赴中文大學出席以《紅樓夢》為主題的3場公開講座，分享他對這中國文學巨著的研究和體會。
...
詳情
相關新聞
