員佐級協會批打擊士氣 「未必好人」論 黃偉綸：無意冒犯警隊

員佐級協會批打擊士氣「未必好人」論黃偉綸：無意冒犯警隊

[2018.07.27] 發表

【明報專訊】「警察都唔一定個個好人。」發展局長黃偉綸上周喺書展同青年分享閱讀心得時，引用日本推理小說家東野圭吾嘅作品，比喻人性複雜，雖然局長只係分享讀後感，但警察員佐級協會就好不滿，前日去信局長表示「極度遺憾」，批評言論打擊警員士氣，「大大傷害警務人員的信心」，更形容「人言可畏，何?局長之言」。黃偉綸噚日回信，話對引起疑慮深感不安，強調絕非有意冒犯，佢會繼續全力支持警隊執法咁話。

陳志全:協會唔好作賊心虛

黃偉綸當日提到世界唔同地方都有社會問題，話自己鍾意東野圭吾嘅論點：「罪犯未必係壞人，犯罪亦都有好多客觀嘅原因，都好多值得同情嘅地方；同樣警察都唔一定個個好人」。員佐級協會聲明一出，唔少網民質疑協會「玻璃心」，有人引述警方數字，話今年上半年因犯案被捕嘅警員人數上升逾八成至24人。

唔少民主派更出聲撐局長，人民力量陳志全喺facebook呼籲協會「唔好作賊心虛，對號入座」，又諷刺協會「全世界警察都可能有壞人，唯獨香港警察就肯肯定個個都係好人！香港絕無黑警！」

政務司長張建宗噚日就為黃偉綸解畫，指對方純粹係分享讀書感受，強調政府知道警隊係盡忠職守，對維持治安居功至偉。

稱想表達人性複雜倡寬恕

黃偉綸回信協會澄清，話當日主要想表達人性有複雜面，傳統被冠以正面標籤嘅人物角色未必百分百完美，「如明白這一點，人與人之間或可多點寬恕包容，相互理解，體現同舟之情」，但當日匆匆幾句，未能清楚說明呢個觀點。佢話自己長期喺政府工作，親身接觸唔少警務人員，「對警務人員堅守崗位、維護法紀、服務香港的專業盡責精神，深表佩服」。

對於局長解畫，員佐級協會收唔收貨呢？協會主席林志偉同Emily講，就呢件事無其他補充喇。