大埔區會選主席 或阿斌鬥阿嬌
[2019.03.27] 發表
【明報專訊】27個鄉事委員會今個月陸續改選領導層，主席、即係「鄉頭」會成為區議會當然議員，現為西貢北約鄉委會主席嘅李耀斌噚日喺無競爭下自動當選。身兼大埔區議會同鄉委會主席嘅張學明，早前唔再競逐連任鄉委會，其區議會當然議員任期月底屆滿，大埔區議會要開特別會議選主席。地區消息話，李耀斌有意更上一層樓選區議會主席。
張學明月底任期屆滿
李耀斌噚日同Emily講會積極考慮，都希望進一步為地區服務，但強調未有決定，有決定先會盡力拉票。大埔區議會副主席、民建聯黃碧嬌都傳出有意選主席，嬌姐噚日話要等張學明任期完咗先決定，現時首要諗嘅係同張學明食飯，感謝佢為區議會付出嘅努力。嬌姐話視區議會建制派同事係「兄弟議員」，如果決定選主席，都希望攞到佢哋支持。大埔區議會由建制派主導，相信正副主席仍然係佢哋囊中物。
荃灣區會主席亦要補選
荃灣區議會面臨同類情况，現任主席鍾偉平冇選鄉頭，主席位將要補選。荃灣區議會嘅建制派議員話，好大機會由現時副主席黃偉傑擔正，黃偉傑話如果得到議員同事及社區人士支持，佢會積極考慮。
更多港聞
相關新聞
