【明報專訊】浸大學生會會長方仲賢之前去鴨寮街買激光筆畀差人拉，公眾先知呢樣嘢喺警察眼中係屬於攻擊性武器嘅「雷射槍」。Emily獲得一份警隊行動部最近發畀前線警員嘅《激光防護指引》，但就唔見有提到「雷射槍」。 頭盔加反光貼原來擋唔到 份指引首先介紹常見屬可見光嘅激光分紅綠藍3種，根據功率分4類，其中2至4類會傷眼，可致閃盲或失明，而第4類激光就會燒傷皮膚。指引提醒前線警員唔好直視激光，如果手掌感灼熱，就唔應該用身體擋激光，要搵嘢擋，仲話護目鏡或防護裝備只能減低相應波長嘅激光，唔能夠完全阻擋，而防暴頭盔面罩上貼嘅半透明反光膠貼亦唔能夠阻擋任何波長嘅激光。 指引又提醒指揮官，應該向「激光攻擊者」發口頭警告，指出係襲警行為，如果可以，應該阻止激光襲擊。指引又話，行動部會盡快購買更多護目鏡畀同事使用，並繼續積極研究同物色最適合用於行動嘅護目裝備。Emily睇晒成份指引後有少少疑惑：點解無提過「雷射槍」3個字嘅呢？
|
| |
| |
;){kind=small}
;)
