【Emily】中大學者：老青兩代觀感差咗
[2019.08.22] 發表
【明報專訊】面對人口老化，前衛生福利及食物局長、中大公共衛生學院講座教授楊永強又有新搞作，就係推動跨代共融。學院喺馬會支持下同3間社福機構合作，推動「長幼情」跨代共融計劃，分3個項目，其中一個係由長者同年輕人搭檔煮嘢食，等兩代人學習互相欣賞同包容，打破隔膜同誤解。佢哋發現，最近嘅社會運動，令跨代對對方嘅印象都有改變。
話說計劃去年開始搞，老友記同後生仔一齊煮餸後，會請佢哋填問卷了解互相嘅印象，例如你覺得老人家有彈性定係固執之類。負責計劃嘅中大醫學院教授黃麗儀話畀Emily知，對比上年，今年年輕人同老人家對於對方嘅印象都負面咗。佢話會畀參加者選擇一堆形容詞形容對方，包括「廢中」同「廢老」，最終有幾多人揀呢兩個詞語呢？佢話要賣個關子。
計劃另一個項目叫「愛故事家庭」，由參加者嘅家庭成員互相訪問，重溫及整理老人家嘅人生經歷，希望共同欣賞長者燦爛人生。講起上一代嘅生命故事，楊永強就諗起爸爸在生時，同佢講番走難時執拾爛鐵鑄成鑊，再用嚟煮飯畀日本仔食以維持生計嘅往事，令佢印象深刻。
更多港聞
【Emily】憂擾亂金融中心 張華峰倡規管「亂提款」
【明報專訊】反修例運動遍地開花，示威者用唔同方法要政府回應訴求，包括從經濟方面入手，想去癱瘓銀行體系，好似撳錢、將港紙轉成外幣、取消中資銀行... 詳情相關新聞
