【Emily】公僕侄女獲薦聯國 陳帆：不知情 無份遴選
[2019.12.25] 發表
【明報專訊】外交部駐港特派員前日舉行發布儀式，公布5名香港年輕公務員將由國家推薦，在聯合國擔任初級專業人員，其中唯一女將、機電工程署衛生工程機械工程師陳莉婷，將會任紐約聯合國總部採購司，原來佢係運輸及房屋局長陳帆嘅侄女，惹來兩人關係有無影響遴選結果嘅質疑。Emily問過正在休假嘅陳帆，佢話對侄女嘅申請同遴選事宜並唔知情，自己無參與過遴選工作，仲話其實當年喺機電工程署工作期間，唔係太多人知道佢哋嘅關係。
稱機電署工作時亦無接觸機會
陳帆2011年12月起出任機電工程署長直至2017年中擔任運房局長。佢同Emily憶述，當年侄女考入機電署後，佢都係事後先知道，因為侄女過去從未提及過要入機電署。佢話自己當時已經係署長，侄女就係基層人員，故工作上全無接觸機會，自己亦無向部門其他同事提及，「除非佢會直接向我匯報，因涉及利益衝突才要申報，否則可能反而影響到佢」。
陳帆又話，今次係香港首次參與有關計劃，港府方面係由公務員事務局負責，佢自己無參與過任何工作。佢仲強調，遴選工作係有聯合國代表參與，並唔係由外交部駐港特派員公署同港府方面揀選，佢相信聯合國都會有要求，不會隨便了事。
更多港聞
【明報專訊】區選勝出者即將上任區議員，唔少候任議員都搵緊地方開辦事處及準備物資。東區區議員徐子見上星期喺facebook批評，政府取消容許議...
詳情
相關新聞
