【Emily】組工會浪潮 工盟狂收查詢電話
[2019.12.27] 發表
【明報專訊】反修例風波持續至今，網民多次發起「三罷」行動，職工盟主席吳敏兒噚日喺商台節目《在晴朗的一天出發》話，過去一個月收到好多人打電話嚟問點成立工會，試過一日超過10個，涵蓋行業包括醫療、資訊科技、金融、建築、酒店、公務員等。佢相信係因為過去發動罷工嘅成效未算理想，所以市民希望籌組工會號召更多僱員罷工。
吳敏兒話，市民想透過成立新工會發動罷工，係和平嘅做法，預計「新工會浪潮」影響唔細。但佢提醒有意籌組工會嘅人，唔應該只係為爭取立法會功能界別選舉嘅選票，亦要做好本分，爭取工人權益，否則將會令成員流失，被除名。
民主派要有400幾個新工會先夠
吳敏兒話現時全港有600幾個已登記工會，工聯會屬會佔300幾個，若要改變現時制度，「一定要夠多工會」，估計民主派要有400幾個新工會先足夠。但佢話新工會未必趕得切喺明年換屆嘅立法會功能界別選舉投票，因為法例規定工會運作12個月先有投票權。
更多港聞
【Emily】Boxing day日偏食 素人望天話神奇
【明報專訊】噚日係「拆禮物日」，亦係香港出現日偏食嘅日子，唔少人把握機會觀賞呢個天文現象。香港太空館中午12點開始舉行日偏食觀測活動，唔少市... 詳情
相關新聞
