【Emily】阿臻簽約「唔露面」 「石牆花」終覓辦事處

[2020.12.24] 發表

【明報專訊】關注囚權嘅立法會前議員邵家臻，今年中成立公司「石牆花」爭取獄政改革，近日搵到辦事處營運，不過都一波三折。阿臻同Emily講，早前同業主傾好價錢、交咗文件，已經冇提及囚權字眼，但業主都寧願唔租；後來佢搵單位就「退後一步」，簽合約都唔出現，最終覓得現址。

同樣關注囚權嘅立法會前議員張超雄，噚日成為石牆花辦事處第一個「客人」，阿臻話辦事處目前有見個案、寫求情信，亦要籌集物資畀人探監用，預計日後都會為可能入獄嘅年輕人開班，等佢哋多認識監獄、做定心理準備，以及會見家屬，以建立家屬支援系統。

開支「逐個月諗」：唔敢眾籌

營運社企唔容易，阿臻形容營運開支係「逐個月諗」，每月約10萬元，佢用過往立法會儲落嘅薪酬，同埋好友捐錢先夠「第一炮」，1月有足夠資金營運，2月未籌夠，現時環境都唔敢眾籌。佢話未來會同黃店「珈啡公義」合作，購入咖啡並由市民自由捐獻，希望可以「用咖啡在石牆種花」。

更多港聞

【明報專訊】港人因新冠病毒疫情「被困」香港，唔少人心思思好想去旅行。位於東涌嘅中度弱智人士宿舍鄰舍輔導會怡東軒嘅職員，前日就合力將院舍「變身... 詳情

【明報專訊】近日有風聲指人大常委會將出手處理區議會問題，包括列明區議員要宣誓、估計大量民主派區議員會被指未能符合宣誓內容而被DQ（取消資格）... 詳情