【明報專訊】香港回歸19周年在即，「香港各界慶典委員會」噚日公布一年一度嘅慶祝回歸活動，預計200幾項活動會吸引超過30萬市民參加，其中重頭戲係七一起一連3日，邀請「甘肅省歌舞劇院」喺紅館表演經典舞劇《絲路花雨》，今個星期六會向公眾派3000張免費票，手快有手慢無。 周六派3000免費票 《絲路花雨》咩來頭？原來呢套舞劇以敦煌壁畫同絲綢之路做題材，喺京奧同上海世博等國家重要場合上都演出過。 另外，慶委會喺6月30日至7月3日會舉辦購物節，超過3500間商戶提供優惠，市民喺呢啲商戶消費滿100元，可以憑收據去指定地點換領禮品，但慶委會無透露係咩禮品同總值幾多。慶委會七一前後亦會派發10萬個福袋畀基層家庭，相信所費不菲。 身兼慶委會主席嘅工聯會榮譽會長鄭耀棠話，暫時未估計到所有活動嘅總開支，但就話淨係3場舞劇表演，已經要使300萬至400萬元，希望可以配合推廣一帶一路，特首梁振英同3個司長、中聯辦主任張曉明等，就會喺七一當晚出席首場表演。
|
| |
| |
