【明報專訊】今日係本屆立法會議員任期最後一日，離別議會在即嘅人民力量陳偉業(大嚿)，噚日舉辦告別茶敘，亦同約30個人力及社民連成員及支持者搞歡送會。大嚿話嚟緊一年會先休息，計劃同老婆先去加拿大探親、睇北極光，再去歐洲旅遊。佢透露太太原來喺選舉日後兩日已經遞信辭職，11月就走得，兩人到時就可以齊齊享受人生。 61歲嘅大嚿喺政圈打滾超過30年，佢坦言唔知自己慣唔慣放低工作，又話人民力量不設會員制，所以離任議員喺人力唔會有職位，笑言𠵱家要叫佢做「人民力量支持者」，至於自己會唔會選番入執委，就容後再議。 回望過去，大嚿話無乜嘢唔捨得，但遺憾香港仍然存在好多不公義，佢預言立法會至社會未來會有更多抗爭，但感嘆愈多抗爭嘅原因，係香港面對更多高壓管治。 指「網上稱雄」未必感受市民需要 今年有多個比大嚿走更激進路線嘅議員入局，但大嚿認為喺現時環境，佢哋做到嘅嘢唔會比人社過去4年做到嘅多。佢又希望新一代政治人物可以認真研究政策，並「落番社區」，因即使「網上稱雄」，其實未必感受到市民真正需要。
|
| |
| |
;){kind=small}
