【明報專訊】現時住喺灣仔會景閣嘅特首參選人林鄭月娥，日前自爆發現附近便利店無廁紙買，唯有搭的士返政務司長官邸攞，呢番話近日成為選戰花邊新聞，引嚟英國媒體關注。BBC前日就以「香港為林鄭搵廁紙咯咯笑(Hong Kong chortles over Carrie Lam toilet paper hunt)」為題，話林太呢番話令佢成為社交媒體嘅笑柄，形容林太喺爭取民心方面，似乎贏到嘅嘲笑比尊重多。 英國《每日郵報》噚日就形容呢次係「廁紙門」，林太現時備受批評，包括她對香港嘅認識亦被質疑，引述有網民話聽完林太呢番話後「笑到碌地(I'm laughing so hard, I'm on the floor)」。 另外，近日facebook出現一個「We撐林鄭」專頁，支持林太做特首，專頁強調係自發，唔係官方組織，無接觸過林鄭同對方競選辦。Emily噚日問專頁有幾多人營運、同有無人受薪營運等，截稿前未有回覆。林太競選辦早前就講過，呢個專頁與選舉辦無關。 fb專頁撐林太 競選辦：唔關我事 專頁前晚發表一個題為《林鄭童話之Carrie前傳》嘅故事，形容「很久很久以前，有一個名叫Carrie的小朋友，一直勇於克服困難，最終長大後，成為一個有愛心、努力及不畏強權的公務員」，Carrie為咗身處嘅小島，「決定放棄安逸退下來的日子，決心爭取成為小島的守護者」。呢篇文截至噚晚吸到超過400個讚好同「心心」，但同時有逾160個「嬲嬲」，唔知下集故事嘅反應會點呢？
|
| |
| |
;){kind=small}
;){kind=small}
